نجيب محفوظ

لَمَّا يِغيبْ
بِنلاقي إن الحُزْن ساكِنْ في الأماكِنْ
والوشوشْ تحت المظَلَّه المَأساوِيَّه
بِتْوَدَّع الروحْ اللي فاتِتْ مِنْ هنا
رَسَمِتْ جمال الأمكِنَه
ولأنها متمكنه مِنْ فَرْزْ قَلْب البُندُقَه مِنْ قِشْرَها
كانت كَشاهِدْ في مرورها
وسْجِلَّها المَكتوب ح يِفْضَلْ
لَمْ تشوبُه فى يوم شوائِبْ الاقتباس
وعَشانْ كِدَه زيتُه أصيلْ
والضوء بقَنديلُه جميلْ
روحْ باقيَه بَعْدُه تصَبَّرْ الحلم النبيلْ
فنلاقي قَلبْ الأُمسيات قادِرْ يِضيء بالذِكريات
والكِلمه لَمَّا تكون جهات متشَعّبه
شامله الأماكِن والبَشَرْ
ومْسَرْسِبَه بين الحاجات
فازاي يِقولوا إنُّه مات ،
والموت ما مَسِّشْ قلب نَبْض في كلمِتُه ؟!
وف كُل رُكْن فات عَليه
باقيَه حكايات
باقيَه روايات مَحْفوظَه بِنَجيبْ الكلام
ولا عُمْرَها راحْ تِنْطِوي بين السُكات
فازاي يقولوا إنُّه مات ؟!