من غير ما
أقول بيرم؛
له وقفة قُدَّامى
له حرف فى كلامى
له لحن دار بِيَّه، وان كنت لا "أعلم"!
ويّاك
تترد الروح فى الموج والبحر
والهوا والرمل
وكلام ممدود على شط العمر
بيمد قلوعه تمس سحاب الغيم
بشويش
ألقاه على وش السما كرانين دانتيل وورد..
وبتضحك
فاضحك من غير حد
وأحس بإن الفرحة معاك م القلب بجد
تترد الروح -ويّاك- واترد
أنسى التوهان
وأحب -ف قربك- كل مكان
وانسى الأشواق فى إدين الخوف
الماشى بعيد خربان وجبان
ومعاه خيالات الشرد
وتلوج أعاصير البرد
تبعد
وف لحظة قُربك يبقى ما بينى وبينهم سد
يا ابن الإسكندر وكُرَيِّمْ
وصديق الشيخ سيد درويش
وكأنك جيش
حامى حدودى
ساند عودى..
بيمس وجودك أحلامى
فيغيب الشر.. يرحل عنّا
وتدوس الشوك فيزول من أقدامنا
وتقول
فيمس السحر نسيم البحر
وترفرف بسمة رقيقة ترد الروح فى رخام تمثال
الإسكندر
حاجة تحيّر.
|
