حمادة وحسان ضحايا نظام فاشى

الخميس, 28 فبراير 2013 14:11

 

 
 
بقلم : نهى محمد
 
ركب حسان القطار واتحشر بين الركاب باحثا عن مقعد فى قطار البهايم كما يطلقون عليه وإن كان كل ركابه من البنى آدميين لكن من الدرجة العاشرة أو الللى ميتحسبوش أصلا بنى آدميين ..جلس حسان متخفيا بشاله الكبير آه كم يحب هذا الشال فقد أهدته له فاطمة بعد أن خطبها من أبوها من سنة وقبل أن يذهب مجندا فى الأمن المركزى ..
شرد ذهنه فى أحلامه الكبيرة البسيطة مخاطبا فاطمة " أيوه يا فاطمة أنا راجع أهه يا بت عندى اجازة طويلة يجى شهرين كده ومعايا قرشين كويسيين ممكن نتجوز بقى مفيش مشاكل خلاص حنقعد مع امى فى البيت وحافرشلك الاوضة احسن فرش .متخافيش مش حضيع الفلوس كلها وبعدين لو ضاعت حيجى غيرها البيه الضابط وعدنا ان كل اللى حينفذ الاوامر كويس الباشا الكبير اللى بيحب مصر حيرضى عنه ويديله مكافأة كويسة وانا بانفذ الاوامر بالحرف علشان خاطرك يا فاطمة وعلشان اعيشك احسن عيشة ووقف القطار فى المركز وجرى حسان من القطار باحثا عن ركوبة لبلدهم فلم يجد سوى كارو محمل برسيم وجاره حمار تعبان نط فوق البرسيم وخلاص ووصل بلدهم ولم يجد فاطمة   فى انتظاره زى العادة قال معلش ماهى مش عارفة ان انا جاى النهاردة
دخل دراهم وجرى على أمه يقبل يديها فاشاحت بوجهها عنه ..قالها فى ايه يا امه انتى مش متوحشانى ولا ايه ؟ ردت ..انتى لاابنى ولا اعرفك بعد عملتك السودة ..قالها فى ايه بس يا امه ..قالته روح اسال ابو فاطمة
وصل دار ابو فاطمة قاله السلام عليكم يا حاج ..لم يرد الحاج ابو فاطمة السلام ولكن قاله يا بنى انا معنديش بنات للجواز اتفضل دبلتك والطرحة اللى كنت جايبهم لبنتى ومع السلامة ..انتاب حسان الذهول هو فى ايه يا حاج ده انا جاى اقولك نحدد ميعاد الجواز رد الحاج يا بنى بنتى مش ليك واغلق الباب فى وجه حسان ..
مشى حسان مش عارف يروح فين ولا ايه اللى حصل لقى فاطمة امامه قالها فى ايه يا فاطمة ردت فاطمة مش عارف يا حسان فى ايه دى كل الدنيا شافتك وانت بتضرب حمادة فى التلفزيون ..ليه يا حسان ليه عملت كده انا شفتك انا عارفاك كويس لو كل الدنيا قالت مش انت انا حاقول هو حسان ..ليه ياحسان تعمل كده فى الرجل الغلبان جبت القسوة دى كلها منين ولما بتعمل معاه كده حتعمل فيا انا ايه انت ملكش امان روح يا شيخ منك لله ..
لم يستطيع ان يرد عليها وعرف ان سره اتكشف وبان كل شىء رغم ان البيه الضابط قالهم يا رجاله محدش حيعرفكوا ومفيش تصوير متخافوش وبعدين انتوا بدافعوا عن مصر وبتخلصوها من الخونة الكفرة اللى ميعرفوش ربنا ونفذ حسان الاوامر والله نفذ الاوامر بالحرف  ركل وضرب وسحل وشتيمة وكل حاجة قالوا له عليها ماهما برضه فاهمين عنه .. حسان مش فاهم ليه الناس بتهاجمه ليه فاطمة سابته ليه امه مش عايزة تكلمه مش فاهم فعلا مش عرف يستوعب ليه ..صرخ حسان باعلى صوته ومحدش سمعه غير نفسه ليه الناس مش بتفكر فى العسكرى الغلبان ده وحاله محدش فكر ان العسكرى ده بيتبهدل اكثر من حمادة لا اكل كويس ولانوم زى البنى ادمين ولا معاملة طيبة بس شتيمة واهانة وضرب وبيعامل معاملة الحيوانات ولو مات ملوش دية والبيه الضابط يقولهم يا اما تنفذوا الاوامر من غير تفكير علشان احنا عارفين مصلحة البلد يا حبس يا ولاد ... لغاية مايبان لكم صاحب وطبعا مبيبنش صاحب ..
ده انت غلبان اوى يا حسان والقرشين اللى بتاخدهم من الامن المركزى يدوب بياكلوه هو وامه بالعافية والبيه الضابط قال لهم اللى حيدافع عن مصر ويضرب جامد له مكافاة كبيرة وقال حسان بينه وبين نفسه طاقة قدر يا ولا واتفتحت لك يا اضرب متضربش ليه هو اللى حيضرب ده احسن منك وبعدين اهى علقة تفوت وخلاص واخد القرشين واتجوز فاطمة وادخل الكهربا الدار واجيب قاعدة افرنجى لبيت الراحة هو انا مليش نفس ابقى بنى آدم ؟ ومحدش حيحاسبنا طيب يحسبونا على ايه ده احنا عايشين ولا البهايم يمكن البهايم كمان احسن علشان صاحبها بيخاف عليها .. وضرب حسان وشتم حسان وسحل حسان وعمل كل حاجة وخد القرشين ..
طيب كنت اعمل ايه يعنى ما انا لو منفذتش الاوامر حاكون انا مكان حمادة واى حمادة ولما نفذتها امى غضبت عليا وفاطمة سبتنى ..ليه يا دنيا معندة معايا ده انا غلبان اوى ومش عايز منك حاجة غير شوية حنية بس يا خسارة الغلابة ملهموش نصيب غير عند اللى خالقهم ..
جلس حسان كثيرا عند الشجرة الكبيرة على الترعة ومروحش الدار تانى وفى الصباح وجدوه معلقا فى الشجرة انتحر حسان ولكن خلينا نكون ادق قتل النظام الفاسد حسان ولكن حسان ملوش دية علشان كده مات سكتى من غير لا حس ولاخبر .وفى الوحدة بتاعته شطبه رقمه من السجلات ونادى الصول فين حسان الجديد .. تمام يا افندم ..
 
تعليقات
لا يوجد تعليقات