وحيد حامد وهشام قنديل وابو احمد

السبت, 02 مارس 2013 14:21

 بقلم :نهي محمد
سألت نفسى لماذا لااجرب احساس جديد مختلف بالكتابة مباشرة على الكومبيوتر بدلا من الكتابة على الورق بقلمى الرصاص طبقا وطقوسى المعتادة ؟ ربما  تجربة شىء جديد تمهد لافكار جديدة وروح جديدة فى الكلمات ؟..وبدات اكتب واكتب ولم اشعر باى شىء جديد لا فى افكارى ولا كلماتى ؟ ترى هل لاتقوى التكنولوجيا على تغيير المشاعر ؟ انها نفس المشاعر المتعادلة التى لااعرف لها وصفا ؟ كل شىء هذه الايام اصبح متشابها لا بل نسخا مكررة من بعضها البعض ؟ ..
اترك الكتابة واحاول ان اقوم بعمل آخر ألجا للمواقع الاخبارية أقرأ عن وحيد حامد ولقائه مع محمود سعد وهو يقول ان مخطط تقسيم مصر بدأ ويقاطعه محمود سعد يا استاذ وحيد ده كلام خطير فيرد قائلا اعرف انه كلام خطير ولكنها رؤية سيناريست طبقا لواقع يعيشه؟ .. اشعر بالخوف والاحباط ابحث عن اخبار محلية فى الوزارات المختلفة ربما اجد بصيصا من الامل .. وفعلا ارى تصريحا لرئيس الوزراء هشام قنديل ان الاضرابات الفئوبة انخفضت الى 5% خلال الايام الماضية واضحك من كل قلبى على هذه الفكاهة الجميلة فالخبر الذى يليها مباشرة هو اضراب الاطباء جزئيا واعتصام عمال الكتان امام الاتحادية وغيرها من الاعتصامات اللى مش فئوية علشان الدكتور هشام ميزعلش ..
اقول طيب مفيش فايدة فى النت والاخبار انزل امشى فى الشارع يمكن اشوف شىء تغير فى الايام الماضية وبالفعل اجد تغييرا جذريا نسبة سيارات الاجرة والميكروباص المتكدسة امام محطات البزين الحمد لله فى زيادة ولاحرج .. الزبالة فى الشوارع موجودة وبالزيادة ايضا كل الخير موجود .. اشعر بغثيان من رائحة القمامة المح بائع الخضار فاتجه اليها بحثا عن ليمونه واطلب منه ربع كيلو بجنيه مثلا فيقول لى الكيلو ب12 جنيه تخدى مانجا اصلها باربعة جنيه بس الكيلو .. واضحك من قلبى واقوله طيب يا عم سيد الطماطم بكام يقولى المجنونة النهاردة بخمسة جنيه اوزن لك  اثنين كيلو ؟ اخذ الليمون واجرشه من غلبى لعلى اهدأ قليلا من الغيظ والفرسة اللى انا فيها ..
ارجع البيت اجد البوابة تبكى بشدة واسالها ايه الحكاية يا ام مصطفى تقول لى اخويا حيقبضوا عليه ؟ - ليه يا ستى  اصله خد قرض من البنك وعمل مشروع فرن وفشل وخدوا منه الفرن اللى جابه لما اتاخر فى القسط  والشهر اللى فات حجزوا على بيته اللى هواصلا بيت حماة وهو قاعد معاه ودلوقت عايزين يحبسوه علشان القسط والنبى ماتعرفيش نروح ديوان المظالم منين؟ .. نسيت اقول لكم ان القرض 14 الف جنيه .. يعنى سايبين مليارات المصريين اللى فى الكاريبى والكنارى ورايحين يدوروا على ابو احمد والـ14 الف جنيه فى كفر ابو تشتت ..وسلام على الثورة اللى راحت فى الوباء زى هنادى .. ولاعزاء للمصريين اللى لسه فاكرين ان مصر بلدهم مش بلد الاخوان اللى جابوهم علشان يتمتعوا فى القصور بعد عذاب السجون ويطلعوا كل اللى شافوه علينا بس من غير ماينسوا نفسهم بقرشين كويسين وشاليه فى المنتزة وفيلا فى مارينا وتشطيب 5 نجوم للشقق الجديدة فى التجمع الخامس وافراح 7 نجوم لولادهم ويالا يا بلد متزعليش ..لسه فى امل يا مصريين بس نقوم بقى من النوم ونفهم ان المخطط اشتغل بجد ويا نبدأ ندور على بلدنا يا نروح ننام ونشد الغطا .. 
تعليقات
لا يوجد تعليقات