عم دسوقي نجاركوم الدكة

الخميس, 12 يوليو 2012 16:55

عايزين نعطي فرصة "لمرسي" علشان يحقق آمالنا وأحلامنا

والإعلام السبب في حالة عدم الفهم عند المواطنين..

والنظام السابق علمنا الشحاته وليس الشغل

"إحنا لازم ندي فرصة لرئيسنا مرسي علشان يعمل حاجة ويحقق لينا كل مطالبنا وأولها أنه يشغل الشباب اللى هم عيالي وعيال أخواتي وشباب البلد كله بدل ماهم من غير شغل من ساعة ما خلصت الدراسة" هكذا كان بداية الحديث مع عم "دسوقي حسين" 60 عاما، أشهر نجار بكوم الدكة في الإسكندرية مع "أمواج".

ويقول عم دسوقي ببساطة شديدة وهو يقوم بنشر الخشب للرسم عليه: حتي لو كان "شفيق" اللى نحج ماكنتش ح أزعل إحنا لازم نصبر شوية علشان نقدر نحقق أملنا وأهداف الثورة.

"أمواج سكندرية" سألت عم دسوقي عن الإعلام وخاصة أنه كان يشاهد "برامج التوك شو" أثناء العمل بورشته فيشير إلى أن الإعلام جعل الناس في حيرة شديدة وفي حالة من عدم الفهم ولا نعلم الصح من الخطأ لما تغير قناة مذيع بيهاجم "فلان" تقلب القناة الأخرى بيهاجم "فلان تانى" والناس مش عارفه أى حاجة خالص.

ويستكمل عم دسوقي حديثه بالسياسة ويضيف إحنا قضينا علي النظام السابق والناس اللي كانوا تابعين ليه زى أعضاء مجلس الشعب السابقين اللى علموا الناس الشحاته وإزاى يحصلوا على الفلوس ببلاش بدون أى مجهود من خلال حشد الناس وخاصة الغلابة أيام الإنتخابات ولم يقوموا بعمل شئ للمواطنين.

وعن منطقة "كوم الدكة" ذات الطابع الأثري والطراز القديم يقول عم "دسوقي" الأماكن جميعها من حوالينا تتغير ولكننا نعيش هنا في كوم الدكة في عالم خاص ومازلنا نتبع العادات والتقاليد والعرف القديم ومازالت منازلنا ذات الطراز القديم.

ويشير عم دسوقي إلى أن هناك العديد من الحكايات والروايات التاريخية التى يعيش فيها سكان منطقة كوم الدكة وهي عباره عن عالمهم الخاص الذي يميزهم عن الكثير من أهالي الإسكندرية لأنهم ينتمون إلى الآثار والعصور القديمة.
تعليقات
لا يوجد تعليقات